ILOILO CITY- Handa na ang tanan sa patigayunon nga special session sang Iloilo City Council buwas nga adlaw.
Ini agud istoryahan ang pagdeklarar sang State of Calamity sa syudad sang Iloilo bangud sa Dengue Hemmorhagic Fever Outbreak.
Sa interview sang Bombo Radyo kay Iloilo City Councilor Alan Zaldivar, Chairman sang Committee on Health sa konseho, iya ginpahayag nga positibo siya nga madeklarar ang State of Calamity sa syudad sang Iloilo agud nga magamit na ang calamity fund.
Suno kay Zaldivar, padayon ang pagpatigayon sang preventive measures agud nga matapna ang Dengue.
Lakip diri suno kay Zaldivar amo ang Massive Do Day ukon pagpaninlo, misting kag pagpahangop sa mga pumulyo tuhoy sa paglikaw sa nasambit nga balati-an.
Sa maabot nga Sabado, magapatigayon sang Massive Do Day sa Brgy. San Juan sa distrito sang Molo nga may yara sang pinakamadamo nga kaso sang Dengue sa syudad sang Iloilo.
Nagpanugyan si Zaldivar sa pumuluyo nga makipagbahin sa mga lihok nga ginapatigayon sang city government agud mas madali nga matapna ang Dengue.Samtang suno kay Iloilo City Vice Mayor Jeffrey Ganzon, wala sila sang makita nga posible nga magpamatok sa pagdeklarar sang State of Calamity sa syudad sang Iloilo.
Ini bangud nga suno kay Ganzon, nagahugpong kag naga-ugyon ang tanan nga opisyal sa pagtapna sang Dengue.
