Iga-revisit sang Iloilo City Council ang City Ordinance No. 2014-404 nga nagadumili sang bikini open kag indecent shows sa siyudad
Suno kay City Councilor Frances Grace Parcon-Torres, isa sa ila nga tutukan amo nga klaruhon ang kahulugan sang “indecent show” kag “bikini,” agud indi maghatag sang sala nga interpretasyon ilabi na sa ordinansa.
Ini kasunod sang insidente sa isa ka establisyemento sa Mandurriao nga nag-conduct sang bikini open, nga ginpahayag nga mahimo sakop sang nasambit nga ordinansa.
Nahibaluan nga nagahanda na ang Task Force on Moral Values pasakaan sang kaso ang tag-iya kag organizers.
Suno sa ordinansa, ginakabig nga indecent show ang public display, lakip ang pagsaot nga nagahublas, nga ginakabig nga nagapakamalaot sang paminsaron sang publiko nga bukas sa immoral nga impluwensya.
Gina-review man ang probisyon nga nagahatag sang exemption sa mga aktibidad sang Dinagyang Festival kag Paraw Regatta, ang importante may special permit halin kay Iloilo City Mayor Raisa Treñas.
Bangud sini, ginapalab-ot na ni Parcon-Torres sa mga committee chairpersons ang kinahanglanon sa pag-revisit sang ordinansa agud malikawan ang nagkalain-lain nga interpretasyon sa pagpatuman sang ordinansa.
