ILOILO CITY- Nagpasar sang resolution ang Iloilo City Council nga nagahingyo sa Department of Education kag Commission on Higher Education nga isuspend ang pagsuksok sang school uniform sang mga estudyante sa tanan nga lebel, pribado man ukon pampubliko nga eskwelahan sa Syudad sang Iloilo .
Ini bilang pamaagi agud maproteksyunan ang mga estudyante gikan sa kagat sang lamok nga nagadala sang dengue virus.
Nasaad sa Resolution No. 2019-278 nga sa baylo nga school uniform, ginarekomendar ang pagpasuksok sang jogging pants ukon long pants sa mga estudyante.
Sa interview sang Bombo Radyo kay Iloilo City Councilor Lyndon Acap, nga amo ang author sang resolution, iya ginpahayag nga nagalaum sila sa City Council nga pamatian sang Department of Education kag Commission on Higher Education ang ila hingyo.
Suno kay Acap, isa ini ka pamaagi agud nga matapna ang pagtaas sang kaso sang dengue sa Syudad sang Iloilo sa diin kalabanan sa mga biktima ang mga kabataan nga estudyante.
Nahibaluan nga 10 na ang patay bangud sa dengue sa syudad sang Iloilo.
