Magapasar sang resolution ang Iloilo City Council agud nga mag-request sa national kag local candidates lakip na sa ila nga campaign leaders kag supporters nga indi pag-ipanglansang sa mga kahoy sa syudad sang Iloilo ang mga campaign posters.
Magahingyo man ang konseho nga ibutang lang ini nga mga posters, tarpaulins, ukon campaign paraphernalia sa designated area.
Suno kay Iloilo City Councilor Lyndon Acap, proponent sang resolution, sa lebel sang syudad, naumpisahan na ang pagpangbaklas sa sini nga mga posters nga ginpangtapik sa mga kahoy.
Gin-ako ni Acap nga mangin ang mga incumbent city councilors nga magapa-reelect sa 2022 elections ang lakip man sa mga nawong nga nalansang sa mga kahoy.
“Indi ko na madeny. Sa akon paglibot-libot, wala gid sang bisan isa sa amon nga guwapo. Indi man na namon kagustuhan, ugaling kay may ara bala sang mga supporters nga siguro tama ka excited nga pati sa kahoy ginatapikan nila sang posters. Gina-order gid naton nga kakason ina dayon,” suno kay Acap. “Wala sang isa sa amon nga guwapo. Indi gid na namon kagustuhan.”
Nagpangabay si Acap sa ila supporters nga untatan na ini nga aktibidad. “Indi namon gusto nga maghimo sina nga aktibidad, pero indi gid malikawan, kay kis-a ang aton supporters, over-excited. Imbes nga makabulig kamo sa amon, ginaguba niyo pa kami nga mga kandidato kun ilansang ina sa mga kahoy” suno sa konsehal.
Sa pagsulundan, indi makabig nga common poster areas ang mga kahoy.
Lakip ini sa nakasaad sa Section 3 sang Presidential Decree (PD) 953, kun sa diin nakasaad man nga ang magalapas sa pagsulundan ang pagamultahan sang pagkapreso sa sulod sang anum ka bulan tubtub sa duha ka tuig, kag may multa nga P500 tubtub P5,000 ukon pagka-preso gid kag multa — depende sa discretion sang korte. ##
