ILOILO CITY- Magapatawag sang consultative meeting ang Iloilo City Council agud istoryahan ang kontrobersyal nga crane way sa Dungon Creek kag ginagamit sa ginatukod nga foot bridge sa Esplanade 3.
Sa interview sang Bombo Radyo kay Councilor Ely Estante, chairman sang Committee on Environment kag Infrastructure sa konseho, iya ginpahayag nga tinguhaan niya nga mapatigayon ang meeting subong nga semana.
Suno kay Estante, ipatawag niya sa meeting ang pila ka mga eksperto nga una na nga nagpabutyag sang kabalaka sa halit nga madala sang crane way sa Dungon creek sa diin isa sa ginalantaw nga matabo amo ang pagkalamatay sang mangroves.
Ginpahayag sang opisyal nga nahangpan niya nga dako ang mabulig sang footbridge sa beautification sang syudad apang kon nagahalit ini sa dunang manggad, indi dapat ini pag-itolerar.
Samtang, magapatigayon naman sang ocular inspection si Estante sa 11 ka mga areas sa syudad nga pahamtangan sang mga infrastructure projects.
Ini may kaangtanan sa plano nga pagpang- utod sang mga kahoy kaangay sang mahogany, talisay, bangkal, ipil-ipil, acacia kag iban pa sa mga sites nga may tukuron nga proyekto kaangay sang multi-purpose buildings.
Suno kay Estante, katuyuan sang inspection nga makahimo siya sang rekomendasyon angot sa ginahingyo sang Department of Public Works and Highways nga Resolution of No Objection sa nasambit nga mga proyekto sa diin may mga puno sang kahoy nga dapat utdon.
