Ginahulat pa sang Iloilo City Council ang iga-isyu nga rekomendasyon sang City Legal Office (CLO) may kaangtanan sa halos duha ka tuig na nga ginsuguran nga inisyatibo agud i- review ang Joint Venture Agreement (JVA) para sa Guimaras-Iloilo Ferry Terminal Services (GIFTS) sa Parola Wharf.
Sa interview sang Bombo Radyo kay Councilor Sedfrey Cabaluna, chairman sang Committee on Transportation, iya ginpahayag nga wala pa nakagwa ang legal office sang rekomendasyon sa nagakaigo nga legal nga tikang angot sa ginaalegar kapaslawan sang Double Dragon Properties Corporation nga magtuman sa mga probisyon sang agreement.
Suno kay Cabaluna, base sa mga dokumento nga ila ginauyatan, kinahanglan gid ang mas maid-id nga review bangud nagagwa nga madamo sang disbentaha mga madul-ong sa syudad ang kasugtanan.
Matandaan nga sang Marso 2023, nag-request ang City Council sang Legal Office nga i- review ang probisyon kag i-assess ang pagtuman sang magtimbang nga bahin agud mahibaluan kun kinahanglan ang liwat nga negosasyon ukon ang pag-revoke sang kontrata.
Nahibaluan nga sa committee report, pila sa mga nakit-an nga concerns amo ang masunod: ang gina-remit sang Double Dragon ang tuman ka nubo kun ipaanggid sa volume sang pasahero; napaslawan ang Double Dragon nga mag-account sang insakto sang share sang syudad sa ginakita sang terminal; kag ang kapaslawan sang tiglawas sang Double Dragon nga magtambong sa committee hearings nga ginpatawag sang City Council sa pila ka mga kahigayunan.
Pahayag sang konsehal, indi makapadayon sa imbestigasyon kun wala sang legal nga bulig halin sa Legal Office.
Tuig 2012 sang ginpirmahan ang Joint Venture Agreement kun sa diin nasaad ang paghatag sang syudad sang exclusive 25-year rights sa Double Dragon nga i- develop kag i- operate ang 13,000-square-meter terminal complex.
Sa kasugtanan, nasaad ang share sang syudad nga 1-5% sang gross terminal fee revenues, 1% sang gross berthing fee revenues, 1% sang gross cargo fee revenues, kag 1% sang gross rental revenue.
May urgent call man si Cabaluna kay Mayor Jerry Treñas nga bisitahon ang mga probisyon sang amo nga agreement.
Nahuman ang agreement sang tion sang administrasyon ni former Mayor Jed Patrick Mabilog.
