ILOILO CITY – Nagahulat na lamang sang report nagikan sa Iloilo City Environment and Natural Resources ang Committee on Public Services, Environmental Protection and Ecology kag Committee on Markets and Slaughterhouse sa Iloilo City Council may kaangtanan sa ginhaboy nga kasudlan sang baboy sa Barangay San Pedro, Jaro, Iloilo City.
Sa interview sang Bombo Radyo kay Iloilo City Councilor Ely Estante, chairman sang nasambit nga mga komitiba sa konseho, iya ginpahayag nga gina-usoy na sang mga personnel ni Engr. Neil Ravena sang Iloilo City Environment and Natural Resources ang lugar sa ingud sang suba nagikan sa Barangay San Isidro padulong sa Barangay Sambag, Tabuc Suba kag sa Ledesco agud nga mahibaluan kun sa diin ginhaboy ang kasudlan.
Suno pa kay Estante, posible nga may masakit ang baboy bangud nga kun wala, indi pag-ihaboy ang kasudlan kag mahimo pa nga maluto.
Dako man ang posibilidad suno kay Estante nga wala gin-ihaw sa slaughterhouse ang baboy.
Nagpaandam man ini sa madakpan nga dako ang salabton sa environmental laws.
Ang mga madakpan naman nga naga-engage sa backyard slaughter ang mahimo nga mapreso sang anum ka tuig kag isa ka adlaw tubtob sa 12 ka tuig kag multa nga nagdangat sa P100, 000.
