ILOILO CITY – Nagpanugyan ang Iloilo City Council sa Guimaras Provincial Government, nga hatagan sang nagakaigo nga solusyon ang problema sa kakulang sang sakayang pandagat nga nagabyahe Iloilo City-Guimaras and vice versa.
Sa interview sang Bombo Radyo kay Iloilo City Councilor Atty. Rommel Duron, chairman sang Committee on Transportation sa Iloilo City Council, iya ginpahayag nga kun siya lamang ang madesisyon mas maayo nga pahanugutan ang pagbyahe sang mga wooden hulled motorbanca bangud wala man sang bagyo sa subong.
Indi maayo suno sa natungdan nga naga-antos ang mga pasahero adlaw-adlaw sa pagpila sang malawig nga ginatunaan pa sang paglapas sa health protocol bangud wala na sang pyhisical distancing.
Nagpanawagan man ang natungdan sa Maritime Industry Authority (MARINA) Region 6 nga maghatag man sang konsiderasyon sa mga operators kag crew sang sakayang pandagat kag ibalik anay ang pagbyahe sang mga wooden hulled motorbanca.
Nahibaluan nga ginbasura sang MARINA ang hingyo sang Guimaras Provincial Government nga palawigon ang gahom sang certificate of public convenience sa mga sakayang pandagat nga nag expire na sang Disyembre 31.
Ini ang santo man sa mando ni MARINA Administrator Retired Vice Admiral Robert Empedrad sa diin nagapati ang opisyal nga masarangan sa mga bag-o nga motorbanca nga mapasakay ang linibo nga mga pasahero nga nagapakadto pabalik sa Iloilo kag Guimaras.
