Nagpasar sang duha ka resolusyon ang Iloilo City Council may kaangtanan sa kaso sang acute gastroenteritis sa syudad.
Ini kadungan man sang paghatag ni Councilor Dr. Candice Tupas sang privilege speech kun sa diin ginpakigbahin sini nga mismo ang iya bata ang nakaeksperyensiya sini kag gindala gid sa ospital.
Ang una nga resolusyon nga ginpasar amo ang naangot sa pagpahanumdom sa mga nagahimo kag nagabaligya sang ice kag tubig nga sundon ang ordinansa nahanungod diri.
Ang ikaduha naman nga resolusyon ang nagapatawag sa Metro Pacific Iloilo Water (MPIW) kag South Balibago Waterworks agud magpaathag sang ila “boil water advisory”.
Suno kay Tupas, kun potable water ang gina-deliver sa konsumidor, indi na kuntani kinahanglan ang nasambit nga advisory.
Natalana nga ipatawag sa konseho sa masunod nga semana ang Metro Pacific Iloilo Water kag South Balibago Resources agud magpaathag tuhoy diri.
