ILOILO CITY– Hatagan sang pagkilala sang Iloilo City Council ang ginhimo sang National Bureau of Investigation, nga pag-imbestiga sa kaso sang twin shooting sa syudad sang Iloilo.
Ini matapos nabuyagyag nga duha ka pulis ang may kahimuan sa kamatayon, nanday Allain Muller, kag Delfin Britanico sang tinalikdan nga Enero 19, 2020.
Sa interview sang Bombo Radyo kay Iloilo City Councilor Ely Estante, iya ginpahayag nga dalayawun ukon nagakadapat lang nga kilalahon kag pasidunggan ang ginhimo sang NBI, bangud isa ini ka dako nga bulig agud masolbar ang serye sang pagpamatay sang mga riding in tandem suspects sa syudad sang Iloilo.
Suno kay Estante, kun tul-id lang ang ginahimo nga imbestigasyon sang mga kapulisan, madasig kag mahatagan sang kasolbaran ang
krimen kaangay sang pagpangbiktima sang mga riding-in-tandem sa diin, ang iba sa mga biktima ang naangot sa Iligal nga droga.
Isa ini suno sa iya ka welcome development sa syudad ang imbestigasyon, kag sa masunod nga sesyon sang City Council, magapasar sila sang resolusyon nga magahatag sang pagkilala sa hinimuan, sang National Bureau of Investigation.
Pahayag pa niya, sa subong bisan paano, nahatagan na sang inisyal kasanagan ang kaso nga ginpaninguhaan man sang anay mamalidha nga si Salvador Britanico nga amay sang napatay nga si Delfin Britanico.
Dugang pa sang konsehal, ginarespeto man niya ang nangin imbestigasyon sang mga kapulisan sa syudad, lakip na ang mga imbestigador.
Nagalaum naman siya suno sa natungdan, nga masolbar man ang iban pa nga kaso sang riding in tamdem sa syudad sang Iloilo.
