Ginhangkat ni Iloilo City Councilor Joshua Alim ang mga kaupdanan sa City Council nga nagboycott sa special session nga magpasaka sang kaso batok sa ila may kaangtanan sa pagdeklarar sang state of calamity sa syudad sang Iloilo.
Ini kasunod sang ginakabig kontrobersiyal nga deklarasyon bangud sa ginapahayag wala sang quorum sa konseho sang natabo ang special session sa diin gindesisyunan ang pagdeklarar ang state of calamity.
Sa interview sang Bombo Radyo Iloilo kay Alim, iya ginpanindugan nga may yara sang quorum ang Sangguniang Panlungsod sa diin ila ini ginbase sa Orendain Rules.
Partikular naman nga ginhangkat ni Alim nga magpasaka sang kaso ang mga katapo sang city council nga nagboycott sa session nga ginalakipan nanday Vice Mayor Jeffrey Ganzon, Councilors Love Baronda, Ely Estante, Leila Luntao, Armand Parcon kag Jay Trenas nga lunsay kaalyado ni Iloilo City Lone District Congressman Jerry Treñas.
Nagtambong naman sa sesyon kag nagpabor sa deklarasyon sanday Councilors Plaridel Nava, Candice Tupas, Joshua Alim, Ed Peñaredondo,Daylee Zulueta-Salazar, Mandre Malabor, Lindon Acap kag Butch Gerochi.
Nauna na gin pahayag ni ALim nga pasakaan man niya sang kaso-administratibo ang mga konsehal nga nagboycott sa ginpatawag nga special session sang city council.
