ILOILO CITY — Nagapati si Iloilo City Councilor Atty. Romel Duron nga makapamaayo kun i-delay lang anay ang modernization sang mga public utility vehicle (PUV) sa pungsod.
Sa interview sang Bombo Radyo kay Duron, iya ginpahayag nga indi pa masarangan sang Pilipinas ang PUV modernization bangud sa kakulangan man sang pagpanghanda sang gobyerno.
Suno kay Duron, sa balor palang sang pinakabarato nga modernized jeepney nga nagalab-ot sa P2.4 million kada isa, tuman na ini ka mahal para sa gobyerno.
Ginpahayag man ni Duron nga indi pa preparado ang pungsod sa amo nga tikang, nga suno sa iya, mismo ang gobyerno ang nagapa-delay sang PUV modernization bangud man sa liwat-liwat nga extension sang consolidation.
Ginpakamalaut man sang natungdan ang tuman ka kulang nga subsidy nga ginahatag sang gobyerno para sa mga operators.
Wala man nakalusot kay Duron ang masami nga problema sang kooperatiba nga wala pa sang duha ka tuig, may mga nagakaguba na sa pila ka parti sang modernized jeep.
