ILOILO CITY – Nagsuhestiyon ang chairman sang Committee on Transportation sa Iloilo City Council sa Western Visayas Transport Cooperative nga tutukan ang paghatag sang maayo nga serbisyo sa baylo nga magpasaka sang kaso batuk sa nag-post sa social media may kaangtanan sa nagakatabo nga overloading sang mga modernized jeepney.
Sa interview sang Bombo Radyo kay Atty. Sedfrey Cabaluna, chairman sang nasambit nga komitiba, iya ginpahayag nga apisar nga kinamatarong sang kooperatiba nga magpasaka sang kaso, maathag sa amo nga Facebook post nga may kakulangan sila sa ila serbisyo.
Suno kay Cabaluna, kun maayo ang serbisyo sang mga kooperatiba, ang publiko na mismo ang magahambal.
Pahayag pa niya, makapila na niya ka beses nga gintawag ang atensyon sang mga ini.
Naintindihan man sang konsehal nga economically challenged ang mga kooperatiba bangud nga kinahanglan nila nga lagson ang mga balayran kag posible nga magresulta sa pagpangunyadi.
Apang suno sa iya, dapat nga indi man mabutang sa alang-alang ang serbisyo sa publiko.
Dugang pa niya, ang mga modernized jeepney ang dapat kuntani nga naga-represent sang matawhay nga pagbyahe.
Apang suno sa iya, wala man sang pulos ang modernization kun amo man lang sa gihapon ang serbisyo.
Una na nga ginpahayag ni Mr. Boyet Parcon, ang chairman sang Western Visayas Transport Cooperative nga kuntani, indi na maghilabot pa ang iban nga kooperatiba bangud nga sa ila bahin, nagatrabaho lamang sila sang maayo.
Suno pa sa iya, ang mga pasahero mismo ang nagapamilit nga magsakay apisar nga puno na ang seating kag standing capacity sang mga modernized jeepney.
