ILOILO CITY – Ginlaslasan ni Iloilo City Councilor Romel Duron ang National Grid Corporation of the Philippines matapos nga wala sila nag-ako sang ila kapaltahan sa natabo nga tatlo ka adlaw nga blackout sa Western Visayas.
Diri na kag gintawag sang konsehal ang korporasyon bilang pasaway, arogante kag butigon.
Sa interview sang Bombo Radyo kay Councilor Duron, chairman sang Committee on Public Utilities, iya ginpahayag nga nag-sanction ang Energy Regulatory Commission sa National Grid Corporation of the Philippines sa paglapas sa Department Circular No. 2021-10-0032 ukon ang “Prescribing the Policy for the Transparent and Efficient Procurement of Ancillary Services by the System Operator”.
Suno kay Duron, ini ang isa ka maathag nga halimbawa sa pagpabaya sang National Grid Corporation of the Philippines sa ila katungdanan.
Nahibaluan nga ang ancillary services ang magatindog bilang standby generator, pananglitan nga may matabo liwat nga blackout.
Sa subong, nagduso sang resolution ang natungdan agud maimbestigaran ang naeksperyensyahan nga blackout sa Panay, Guimaras kag Negros Island.
