Gindepensahan ni Kagawad Ed Peñaredondo ang kontrobersiyal nga pagdeklarar nila sa konseho sang state of calamity sa syudad sang Iloilo.
Ini matapos ginkwestiyon sang kampo ni Iloilo City Lone District Congressman Jerry Treñas ang nasambit nga deklarasyon nga iligal kag wala nagsunod sa criteria nga nasaad sa layi.
Sa interview sang Bombo Radyo kay Peñaredondo, iya ginpahayag nga santo sa testimoniya ni City Disaster Risk Reduction and Management Office head Donna Magno nga ila gin-imbitar nga magtambong sa special session, nakapasar sa kwalipikasyon nga mangin basehan sang deklarasyon sang state of calamity ang syudad sang Iloilo.
Suno pa kay Peñaredondo, nagpatigayon man sila sang pagpanalawsaw tuhoy sa pagdeklarar sang quorum.
Apisar gin-ako niya nga indi man siya sigurado tuhoy sa quorum sa konseho sa ginpatigayon nga special session apang iya tindugan ang ila nangin lihok.
Nahibaluan nga nagtambong sa special session kag nagpabor sa deklarasyon sanday Councilors Plaridel Nava, Candice Tupas, Joshua Alim, Ed Peñaredondo, Daylee Zulueta-Salazar, Mandre Malabor, Lindon Acap kag Butch Gerochi.Nagboycott naman ang mga konsehal nga kaalyado ni Congressman Treñas.
