ILOILO CITY – Gin-athag ni Iloilo City Councilor Johnny Young nga ang Special Services Division ang naghatag sang oras nga limitahan ang pagbaligya sang mga ambulant vendors umpisa ’las 5:00 sa hapon tubtob ‘las 5:00 sa kaagahon.
Nahibaluan nga una na nga ginduso sang konsehal ang ordinansa nga naga-limit sa pagbaligya sang mga vendors bangud sa mga naglapta nga basura kag pagbilin sang mga food carts nga indi manami sa panan-awan sang mga turista.
Sa interview sang Bombo Radyo kay Young, iya ginpahayag nga nagkonsulta ini sa Special Services Division kag diri na kag ginrekomendar ang oras sang pagbaligya.
Suno kay Young, indi niya luyag nga mag-untat sa pagbaligya ang mga ambulant vendors, sa baylo ang Special Services Division mismo ang nagduso sang regulasyon.
Samtang, sa bahin naman sang Special Services Division, nagbase lamang ang mga ini sa ‘internal regulation’ bangud wala pa sang ordinansa nga napatuman.
Namalibad naman sa paghatag sang dugang nga detalye ang konsehal natuhoy sa ginaatubang nga kontrobersiya sang ordinansa nga iya ginaduso.
Samtang, nagpamatok si Iloilo City Councilor Rudolph Ganzon sa ordinansa nga ginaduso ni Young nga limitahan ang oras sang pagbaligya sang mga ambulant vendors sa syudad.
Sa interview sang Bombo Radyo kay Councilor Ganzon, iya ginpahayag nga may yara lang sang sala nga interpretasyon sa bahin ni Young bangud indi nagakadapat nga limitahan ang mga ambulant vendors sa pagbaligya, sa baylo, kinahanglan lamang nga i-regulate ang ila pagplastar kag pag-manage sang ila basura.
Suno pa kay Ganzon, indi na kinahanglan pa nga tandugon ang oras sang pagbaligyaanay bangud nagasunod man ang mga vendors sa ginapatuman sang Iloilo City Government.
Ginapahayag dugang sang natungdan nga maayo gid nga mabatian ang bahin sang mga ambulant vendors agud mahatagan ang mga ini sang nagakaigo nga igtalupangod kag assistance.
