ILOILO CITY – Ginhangkat ni Iloilo City Councilor Jojo Javellana ang Iloilo City Police Office (ICPO) nga solbaron ang kaso sang kontrobersyal nga pagbuno kay Human Rights Lawyer, Atty. Angelo Karlo Guillen.
Sa interview sang Bombo Radyo kay Javellana nga amo man ang pinuno sang Committee on Police Matters sa Sangguniang Panlungsod, iya ginpahayag nga nakigsapol na siya sa director sang ICPO nga si Police Colonel Uldarico Garbanzos agud maghatag sang marching order nga solbaron ang pagpang-atake kay Atty. Guillen.
Suno kay Javellana, nagakadapat nga masolbar ang kaso sang nasambit nga abogado nga wala sang white wash sa diin manabat gid ang responsable sa likod sang krimen.
Ginpahayag ni Javellana nga ginahulat nalang nila nga makarecover si Guillen agud nga makatuad ini sang iban pa nga detalye natuhoy sa natabo sa iya para sa pagpasangkad sang imbestigasyon sang kaso.
Nagpasalig naman suno sa natungdan ang ICPO nga himuon nila ang tanan agud masolbar ang kaso.
Samtang, nagpromisa ang director sang ICPO nga mas id-idan pa nila ang imbestigasyon may kaangtanan sa pagbuno sa human rights lawyer.
Sa interview sang Bombo Radyo kay Police Colonel Uldarico Garbanzos, iya ginpahayag nga may yara na sila sang Special Investigation Team para sa kaso ni Atty. Guillen.
Suno kay Garbanzos, isa sa pinakadako nila nga anggulo nga ginalantaw sa pagpangbuno kay Guillen amo ang motibo sang pagpangawat.
Apang suno kay Garbanzos, posible nga may kaangtan diri ang trabaho ni Guillen sa diin isa man ini sa abogado sang 37 ka mga petitions nga nagakwestiyon sa Anti-Terrorism Act sa Korte Suprema.
Magluwas diri suno sa natungdan, lakip man sa ginalantaw nga motibo amo ang personal nga hiligut-anon.
Gin-ako man ni Garbanzos nga dako gid nga bulig sa imbestigasyon kun makahatag sang dugang nga pahayag natuhoy sa insidente si Atty. Guillen.
