ILOILO CITY – Hugot nga ginpamatukan ni Iloilo City Councilor Jojo Javellana ang ginaduso ni Chief Presidential Legal Counsel Atty. Salvador Panelo nga dumilian ang riding-in-tandem ukon pag-angkas sa motorsiklo.
Una na ginpahayag ni Atty. Panelo, nga katuyuan sini nga mabuhinan ang krimen sa pungsod sa diin ang ginatudlo nga mga suspek amo ang riding-in-tandem.
Sa interview sang Bombo Radyo kay Javellana nga amo man ang pinuno sang Committee on Police Matters sa Sangguniang Panlungsod, iya ginpahayag nga tinonto ang nasambit nga proposal.
Wala suno sa iya ginpamisaran sang maayo ni Panelo ang tanan nga pigado nga nagagamit sang motorsiklo sa pag-angkas sang ila kabataan, asawa kag pamilya sa ila palakadtuan ilabi na subong sa tunga sang pandemya.
Ginpakamalaot man ni Javellana si Panelo kag gintawag nga anti-poor bangud daw kaangay nga wala sini ginkonsidera ang mga pigado nga sektor.
Magapasar man siya sang resolution sa Iloilo City Council nga nagapamatok sa nasambit nga proposal.
Suno kay Javellana, nagakadapat nga indi na pag-ulamiron ang tanan nga mga motorista sa nagakatabo nga krimen sa diin ginatudlo amo ang riding-in-tandem.
Panugyan sang konsehal, kun may riding-in-tandem incidents mas maayo nga itugyan nalang ini sa Philippine National Police (PNP).
