Nagpanugyan ang Chairman sang Committee on Police, Penology, Public Safety kag Order and Security sang Sangguniang Panlungsod sa pamunuan sang Iloilo City Police Office (ICPO) nga magpatigayon sang checkpoint sa mga dalanon kun kaagahon kag kagab-ihon sa syudad sang Iloilo.
Ini ang kasunod sang kahangawa sa asud-asud nga crime incidents sa Iloilo City.
Sa interview sang Bombo Radyo kay Iloilo City Councilor Carlos ‘Jojo’ Javellana, iya ginpahayag nga ginhingyo niya kay kay ICPO Director PCol. Uldarico Garbanzos ang police visibility.
Suno kay Javellana, nagakadapat nga hugtan sang mga pulis ang pagbantay sa tanan nga bahin sang syudad sang Iloilo agud mapunggan ang mga krimen nga masami nagakatabo kun kaagahon kag kagab-ihon.
Pahayag sang natungdan, hugot ang pagpati niya nga ginaobra sang mga pulis sang maayo ang ila katungdanan apang kinahanglan lamang mas pabaskugon agud matapna ang lapnagon nga mga krimen.
