Ginkalipay ni Iloilo City Councilor Sheen Marie Mabilog ang ginhatag nga suporta sang iya mga kaupod sa konseho.
Ini matapos nga gin-refer lang anay sang mga konsehal ang iya ginpasar nga resolution sa baylo nga ibasura ini ukon indi pagsuportahan kaangay sang nagligad nga mga session.
Madumdoman nga subong nga aga sa 6th regular session sang 12th Iloilo City Council, nagpasar sang resolution si Mabilog kaangot sa pag-request kay Mayor Raisa Treñas nga hatagan sang award kag incentives ang mga Persons with Disabilities (PWD’s) employees sang Iloilo City Hall kadungan sa selebrasyon sang 88th Charter Day.
Nagsuhestyon diri sanday Councilor Alan Zaldivar, Councilor Frances Parcon-Torres kag Councilor Rex Marcus Sarabia, nga mas maayo kun indi lamang para sa Charter Day kundi tuigan nalang bangud kung subong ipasar ang resolusyon, kulang na ang oras bangud sa Agosto 25 na ang Charter Day.
Bangud sa referral sang resolution, ipaidalom ini sa komitiba nga in charge kag ang magapanguna amo ang Committee on Rules, Ordinances, Resolutions, and Style, Justice and Legal Affairs kag pagaupdan sang Committee on Personnel, Good Government and Public Accountability & Oversight (Blue Ribbon Committee), Committee on Veterans, Retirees, Elderly and Disabled Persons kag Committee on Social Services.
By: 𝑩𝒐𝒎𝒃𝒐 𝑯𝒂𝒏𝒏𝒂 𝑨𝒏𝒅𝒂𝒔𝒂
