ILOILO CITY — Ginaduso sa konseho ni Iloilo City Councilor Miguel Treñas ang pagpatigayon sang libre nga mass wedding sa Iloilo City.
Sa interview sang Bombo Radyo Iloilo kay Councilor Miguel Treñas, iya ginpahayag nga kabahin sa libre nga mass wedding ang libre man nga marriage certificate kag marriage license.
Suno sa kay Treñas, plano niya nga ibutang ang mass wedding sa bulan sang Pebrero kadungan sang Valentine’s Day, Hunyo sa petsa sang Charter Day Celebration sang siyudad, kag Disyembre.
Ginpaathag man sang konsehal nga indi pa regular sa subong ang libre nga mass wedding sa siyudad rason nga ginaduso gid sini nga maaprubahan agud mangin isa ka ordinansa.
Ginabanta nga maglab-ot sa 50 tubtob 100 ka mga magkahagugma ang maakomodar sang mass wedding.
Nahibaluan nga sa subong, may ginabayaran nga ₱1000 bag-o makapasakop sa mass wedding sang Iloilo City Government.
Pasado naman sa first reading sang Iloilo City Council ang ginaduso sang konsehal nga ordinansa.
