ILOILO CITY – Indi kuntento si Iloilo City Councilor Plaridel Nava sa nangin tikang sang kabug-usan nga Iloilo City Council sa kaso ni Councilor Nick Baronda nga nagtambong sa special session samtang nga yara sa gwa sang pungsod apisar wala naka-file sang leave of absence kag wala sang authority to travel.
Sa nangin desisyon sang konseho, markahan nga absent si Baronda sa ginpatigayon nga special session sang Disyembre 28, 2022.
Sa interview sang Bombo Radyo kay Nava, iya ginpahayag nga wala nahambalan ang pagbinutig ni Baronda nga yara siya sa gwa sang pungsod.
Kung matandaan, ginpahayag ni Nava nga sang ginpatigayon ang special session, nagpamangkot siya kun sin-o ang nagatambong virtually samtang nga wala sa Pilipinas.
Sang amo nga tion, wala nagsabat si Baronda apisar nga ginsulit pa ni Iloilo City Vice Mayor Jeffrey Ganzon ang pamangkot.
Suno kay Nava, dapat nga pinahan gid si Baronda.
Subong nga adlaw, gina-draft na niya ang administrative complaint nga ipasaka niya kay Baronda sa Office of the Ombudsman.
Posible sa sunod nga semana, mapasaka na ang kaso.
