ILOILO CITY – Nagaplano si Iloilo City Councilor Plaridel Nava nga pasakaan sang kaso administratibo sa Ombudsman si Councilor Urminico “Nick” Baronda bangud sa paglapas sa Memorandum Circular No. 35 sang Office of the President.
Ini ang kasunod sang pagtambong ni Baronda sa special session sang Disyembre 28, 2022 samtang nga yara ini sa luwas sang pungsod kag wala naka-file sang leave of absence kag wala sang authority to travel.
Sa interview sang Bombo Radyo kay Nava, iya ginpahayag nga tantamount to disorderly behavior ang ginhimo ni Baronda bangud nga sang natabo ang special session, nagpamangkot na siya una kun sin-o sa mga konsehal ang yara sa luwas sang pungsod samtang nga nagatambong.
Ini ang ginsulit man ni Iloilo City Vice Mayor Jeffrey Ganzon, apang wala sang may nagsabat.
May gin-file nga leave of absence si Baronda nga napetsahan sang Disyembre 16, 2022 apang nabaton lamang sang opisina ni Vice Mayor Ganzon sang Enero 3 subong nga tuig gani, ang aprubado lamang nga leave sini ang nag-umpisa sa amo nga adlaw.
Dugang pa ni Nava, nagpadulong sa luwas sang pungsod si Baronda apisar nga yara pa ang Pilipinas sa idalom sang state of calamity bangud sang Coronavirus Disease 2019 gani kinahanglan nga i-notify anay ang presiding officer sang Sangguniang Panlungsod nga amo si Vice Mayor Ganzon.
Sang ulihi, ginhatagan sang Sangguniang Panlungsod sang 72 hours si Baronda agud nga magpaathag sang iya bahin.
