ILOILO CITY – Nagpanawagan si Iloilo City Councilor Plaridel Nava sa tanan nga mga Ilonggos nga mag-ugyon agud manabat ang tanan nga mga indibidwal nga naangot sa pagpatukod sang kontrobersyal nga P680-Milliion Ungka Flyover.
Ini ang kadungan sang ginpatigayon nga condemnation rally sa Ungka Flyover bilang simbolo sang panawagan para sa hustisya agud mahatagan sang igtalupangod ang depektibo nga flyover.
Sa interview sang Bombo Radyo kay Councilor Nava, iya ginpahayag nga naga-umpisah pa lang ini sa diin, kumpiyansa ini nga mapanabat ang mga indibidwal sa likod sang palpak nga proyekto.
Nahibaluan nga natalana nga magpasaka sang kaso si Nava bangud sang paglapas sa Republic Act 3019 ukon Anti-Graft and Practices Act kag Gross Neglect of Duty batuk sa kontraktor nga International Builders Corporation kag opisyales sang Department of Public Works and Highways nga naangot sa pagpatukod sang nasambit nga flyover.
Suno kay Nava, nagapasalamat ini sa mga cause oriented groups, opisyales sang simbahan kag nagkalain-lain nga mga sektor nga nagsuporta sa hublag.
Ginpahayag dugang sang natungdan nga indi ini mag-untat tubtob nga indi manabat ang kinahanglan nga manabat sa palpak nga Ungka Flyover.
