ILOILO CITY – Suportado ni Iloilo City Councilor Plaridel Nava ang lihok ni Iloilo City Councilor Sedfrey Cabaluna nga ukayon ang joint venture agreement sang syudad sa Double Dragon Properties Inc. may kaangtanan sa operasyon sang Iloilo Ferry Terminal-Parola.
Si Nava ang isa sa nagpamatuk sa amo nga agreement sang 2015 apisar nga suno sa iya, kaalyado niya si anay Mayor Jed Patrick Mabilog kag isa siya sa mga abogado sang kompaniya nga may kaangtanan sa Double Dragon Properties Inc.
Sa interview sang Bombo Radyo kay Nava, iya ginpahayag nga kinahanglan sang konseho nga mag-initiate bangud nga para sa iya, indi patas ang 1% nga share sang syudad kun ipaanggid sa 99% nga share sang Guimaras-Iloilo Ferry Terminal.
Suno kay Nava, indi man maayo ang performance sang management base sa iya nahibaluan.
Nakahanda naman siya nga magbulig kay Cabaluna kag yara man sa iya ang kumpleto nga mga dokumento.
Nahibaluan nga ang duta nga ginatindugan sang terminal ang ginapanag-iyahan sang syudad kag ang building ang ginpatukod sang Double Dragon Properties Inc.
