ILOILO CITY – Nagpanugyan si Iloilo City Councilor Romel Duron kay Councilor Sedfrey Cabaluna nga bag-uhon ang pamaagi sa pagsabat kun yara ini sa session sang Iloilo City Council.
Ini matapos nga nainsulto si Councilor Plaridel Nava kay Cabaluna matapos nga gintawag niya ini nga “Manong Nava” kag ginsaruso ni Nava ang bataon nga konsehal.
Sa interview sang Bombo Radyo kay Duron, iya ginpahayag nga kun magsabat, nagakadapat nga magsabat man sang insakto agud indi na magtuga pa sang tensyon sa sulod sang konseho.
Suno kay Duron, nagakadapat man nga mangin responsable sa kada hulag ang mga konsehal.
Ginpahayag dugang sang natungdan nga kadungan sang mainit nga tyempo, kinahanglan man nga mas palawigon ang pasensya.
Nagalaom man si Duron nga mabag-o na ang istilo sang pagsabat ni Cabaluna kag indi ini pagtamdon sang personal.
