ILOILO CITY – Indi pabor si Iloilo City Councilor Rudolph Ganzon sa ginaduso nga ordinansa ni Iloilo City Councilor Johnny Young nga nagalimita sang pagabligya sang mga ambulant vendors.
Sa nasambit nga ordinansa, tugutan lang nga magbaligya ang mga streetfood vendors humalin ‘las 5 sa hapon tubtob ‘las 5 sa aga.
Sa interview sang Bombo Radyo kay Ganzon, chairman sang Committee on Trade and Industry kun sa diin gin-refer ang ordinansa, iya ginpahayag nga libagon ang ginaduso ni Young.
Suno sa iya, nagapangita sang paagi ang syudad agud nga mahatagan sang lugar kun sa diin makabaligya ang mga streetfood vendors kag ipokrito ang ideya nga limitahan ang mga ini agud lamang nga mapasanyog ang turismo apisar nga may yara sang ma-apektuhan.
Una na nga ginpahayag ni Young nga isa man sa mga rason niya sa pagduso sang ordinansa amo ang daku nga problema nga ginabilin nga basura sang mga vendors kag ang trapiko sa mga dalanon sa syudad.
Ang ini nga problema suno kay Ganzon ang ginapangita-an na sang solusyon pinaagi sa pag-amyendar sang mag existing ordinances sa syudad.
Isa sa mga tikang may kaangtanan diri amo ang pagduso ni Iloilo City Councilor Alan Zaldivar nga amyendaran ang isa ka ordinansa kadungan sang pagtaas sang kaso sang cholera kag Acute Gastroenteritis sa syudad.
Suno pa kay Ganzon, kun may nakita nga problema si Young, nagakadapat nga ireklamo kag kun may yara sang solusyon, dapat man nga ipahibalo.
Ginpanugyanan man sini si Young nga mangin sensitibo sa mga ginaduso nga ordinansa.
Subong nga natapos na ang Semana Santa, nagalaum si Ganzon nga napamalandungan kag napanumduman ini ni Young sang maayo kag matandog ang iya nga balatyagon.
Sa pihak sini, nagpasalig si Ganzon nga ipresentar niya sa konseho ang iya committee report.
Nahibaluan nga nag-angkon sang negatibo nga komento nagikan sa mga street vendors kag mangin sang halos kadam-an nga mga Ilonggo ang ginduso nga ordinansa sang first time-councilor nga si Young.
