ILOILO CITY — Nagsabat si Iloilo City Councilor Sedfrey Cabaluna sa mga tinaga nga ginbuy-an ni Iloilo City Councilor Romel Duron batok sa pagpatuman sang tricycle route plan sang Committee on Transportation.
Ini kasunod sang pahayag ni Duron nga wala natun-an sang maayo ang amo nga tikang bangud wala siya sang may nakuha nga sabat kaangot sa tricycle route plan.
Sa interview sang Bombo Radyo kay Cabaluna, iya ginpahayag nga ginarespeto niya ang pahayag ni Councilor Duron, apang ginakasubo niya man nga mabatian nga halin mismo ang tinaga anay chairman sang Committee on Transportation.
Suno kay Cabaluna, ginpangabudlayan sang opisina ang amo nga route plan bangud indi lang siya ang sa likod sini bangud may pila man ka mga tawo nga nagdihon kag nagtuon agud mapatuman ang ruta.
Ginpahayag man sini nga indi niya makuha ang punto ni Duron nga kulang sa pagtuon ang amo nga tikang bangud nalakip man sa konsultasyon si Iloilo City Mayor Jerry Treñas kag ang mga tricycle drivers antes paman maduso ang route plan.
Naghingyo naman si Cabaluna sang tsansa kay Councilor Duron agud mapasangkad ang epekto ang tricycle route plan.
Gin-athag man sang natungdan nga indi man perpekto ang tikang, apang ini ang produkto sang tinuig nga pagtuon antes paman ini natigayon nga napatuman.
Nagapati naman ini nga nangin sentimental lamang si Duron bangud sa pagduso sang bag-o nga ruta, nadula man ang ginpasar ni Duron nga anay zonal route plan para sa mga tricyle drivers.
