ILOILO CITY – Ginakabig ni Iloilo City Councilor Jay Treñas nga pamulitika ang pagkadismaya ni Mayor Jose Espinosa III tuhoy sa panindugan sang Iloilo City Heritage Conservation Council (ICHCC).
Ini ang may kaangtanan sa panindugan ni ICHCC Chairman Dra. Ma. Kristina Treñas nga kun tani nagpakig-angot ang alkalde sa nasambit nga talatapan bag-o gintukod ang children’s playground sa mga public plaza sa syudad sang Iloilo.
Sa interview sang Bombo Radyo kay Councilor Treñas, iya ginpahayag nga wala sang dapat nga ikadismaya si Mayor Espinosa sa nangin pahayag sang iya iloy nga si ICHCC Chairman Dra. Treñas.
Ini bangud nga suno kay Councilor Treñas, normal lamang nga makibot ang ICHCC nga may yara sang gintukod nga playground sa mga public plaza nga ginakabig heritage site.
Ginpanindugan man sang City Councilor nga wala sang malain sa nangin reaksyon sang iya iloy bilang pinuno sang ICHCC nga nagaserbe nga recommendatory body kun mga heritage site ang pagahambalan.
Sa pagkamatuod suno kay Councilor Treñas, ang Office of the City Mayor kag ang City Engineer’s Office lang ang nakahibalo nga may yara sang gintukod nga playground kag wala nakahibalo ang iban pa nga talatapan nga nagabug-os sa ICHCC.
