ILOILO CITY – Nagkomiter ang pila ka mga konsehal sa syudad sang Iloilo nga una nga mapabakuna batok sa COVID-19 agud nga madula ang kakulba sang publiko sa bakuna.
Ang nagkumpirma sa Bombo Radyo nga magapatublok sang bakuna as of press time amo sanday Iloilo City Councilors Atty. Rommel Duron, Irene Ong, Mandre Malabor, Ed Peñaredondo, Dr. Candice Tupas, Allan Zaldivar, Rudolph Ganzon, Ely Estante, kag Jojo Javellana.
Una naman nga nagpahayag si Iloilo City Mayor Jerry Treñas nga siya ang mauna kag may ‘Huo’ naman halin kay Iloilo City Vice Mayor Jeffrey Ganzon.
Sa interview sang Bombo Radyo kay Councilor Peñaredondo, iya ginpahayag nga nagaboluntaryo siya nga mauna sa vaccination bangud wala sang iban nga bulong sa COVID-19.
Suno sa 71 anyos nga konsehal, may kulba man siya nga nabatyagan apang nagapati siya nga indi pag-aprubahan sang gobyerno ang bakuna kun may malain ini nga epekto sa lawas sang tawo.
Luyag ni Peñaredondo nga mangin ehemplo sa iban pa nga mga senior citizens sa syudad sang Iloilo.
Bilang isa naman ka medical doctor, nagapati si Councilor Dr. Tupas sa bakuna kag sa ikasarang sini sa pag-proteher sa lawas sang tawo.
Suno kay Tupas, madugay na niya nga ginahulat ang bakuna apang bangud wala pa man pormal nga naumpisahan ang vaccination sa Pilipinas, mas malawig pa ang mga pagtuon kag may tion pa ang mga tawo nga makahimo sang informed decision.
Bilang isa man ka iloy, ang luyag lang nga tun-an kag hibaluon sang konsehal amo ang kaangtanan sang bakuna sa mga iloy nga naga-breastfeed sa ila kabataan.
Suno naman kay Councilor Ely Estante, indi man tubtob san-o nga manago ang mga tawo bangud sang kahadlok nga mainfect sa COVID-19.
Suno sa konsehal, naggasto na ang gobyerno para sa pag-procure sang safe nga bakuna agud nga indi na madugangan ang kaso sang amo nga balatian sa Pilipinas.
Suno pa sa konsehal, kun kaisa tawo lang ang nagapakulba sa ila nga kaugalingon bangud sa pagpati sa mga huring-huring nga wala man sang basehan.
