ILOILO CITY – Indi pa sigurado kun bala magatambong ukon indi si Iloilo City Councilor Candice Tupas sa oathtaking sang tanan nga winning candidates sa syudad sang Iloilo sang nakaligad nga May 13 midterm elections.
Ini ang kasunod sang imbitasyon ni Iloilo City Mayor-elect Jerry Treñas kay Tupas paagi sa verbal communication.
Sa interview sang Bombo Radyo kay Tupas, iya ginpahayag nga indi pa siya makasabat kun ano ang iya mangin desisyon sa imbitasyon nga magatambong sa oathtaking nga patigayunon sa Hunyo 28.
Sa pagkamatuod suno kay Tupas, nakasumpa na siya kay Sen. Migz Zubiri kag nakasumpa naman siya upod ang iya mga ka-partido sa Nacionalista Party kay Sen. Cynthia Villar.
Kadungan sini, gin-athag man sang Konsehal nga wala siya sang kala-in sang buot kay Treñas nga iya maninoy sa kasal, bisan pa nga nagbulagay sila sang partido sang nakaligad nga eleksyon.
Ginpahayag sang natungdan nga kinahanglan na nga mag move-on ang tanan para sa kaayuhan sang syudad.
