ILOILO CITY – ‘Welcome development’ para sa Department of Interior and Local Government (DILG) ang pagpasaka ni Atty. Dan Cartagena sang Petition for Mandamus, Injunction kag Temporary Restraining Order (TRO) sa Korte Suprema.
Ini ang may kaangtanan sa nabakantehan nga pwesto sang napatay nga si Iloilo City Councilor Armand Parcon sa diin sang nakaligad nga May 13 midterm elections, ika-13 si Cartagena sa pagka konsehal sa syudad sang Iloilo.
Sa interview sang Bombo Radyo kay Atty. Ferdinand Panes, pinuno sang Iloilo City-DILG, iya ginpahayag nga ini ang labing una nga kahigayunan nga may yara sang nagpasaka sang petisyon agud hingyu-on sa Korte Suprema nga mandu-an ang Commission on Elections (COMELEC) nga iporklamar ang ika-13 nga konsehal bisan pa nga natapos na ang proclamation sa 12 ka mga nagdaug nga opisyal.
Ginpahayag ni Atty. Panes nga sa iya personal nga bahin, luyag niya nga makapaguwa sang desisyon ang Korte Suprema tuhoy sa ginahingyo ni Cartagena agud nga may yara precedent ukon basehan.
Sa pihak sini, ginpahayag sang natungdan nga indi na mahimo nga sundon ang rule of succession bangud nga naproklamar na ang mga nagdalaog nga kandidato bag-o napatay si Parcon.
Bangud sini, ang partido sang napatay nga konsehal ang magapili sang magabulos sa iya kag nakadepende naman sa Presidente ang pag-aprobar sini.
