Ginpasigurado sang Iloilo City District Jail – Male Dormitory nga matatapan ang mga Persons Deprived of Liberty (PDLs) sa ila mga kinahanglanon sa medical kag sa ikaayong-lawas.
Sa interview sang Bomb Rayo kay JO2 Krishna Rama Jover, Asst. Chief Health Service Unit of Iloilo City District Jail – Male Dormitory, iya ginpahayag nga ‘in general’ yara sa maayo nga kahimtangan ang ila PDLs subong, ini bangud man sa bulig sang mga opisyal sang BJMP sa higher level.
Suno kay Jover, may mga PDLs man sila nga nagamasakit na nga daan sang nagsulod sa presohan kag kalabanan diri amo ang diabetes kag hypertension.
40 pataas naman ang edad sang PDLs nga masami naga-ekspersyensya sang mga nasambit nga sakit.
Factor naman sa pag-angkon sang sakit amo ang pagbaylo-baylo sang panahon.
Sa kabug-usan nga 1,394 ka mga PDLs Iloilo City District Jail, 21 diri ang diabetic, 63 naman ang hypertensive, kag 15 ang asthmatic.
Nagpasalig man ini nga gina-una gid hatagan sang medical attention ang preso nga may malala nga sakit nga nakabase man sa ila sitwasyon.
Ginapaidalom naman sa counseling session ang mga PDLs nga may mental health condition.
Suno kay JO2 Jose Justo Orbina, Chief nurse sang Iloilo City District Jail – Male Dormitory, paagi sa amo nga tikang, gilayon matumod ang mga PDLs nga nagapangatubang sang mga problema nga mahimo mahulog sa depression.
Ginpasigurado man sang natungdan nga may psychometrician nga naga-check sa mga PDL nga nagabatyag na sang psychological problems.
