ILOILO CITY–Temporaryo nga ginpasirado ang Dalan Mabini sa City Proper matapos natumba ang poste sang kuryente.
Ini ang may kaangtanan sa mabaskog nga hangin tuga sang bagyo Ompong.
Sa interview sang Bombo Radyo kay Jeck Cunlo, pinuno sang Public Safety and Transportation Management Office (PSTMO), iya ginpahayag nga una nga natumba ang streetlight nga nahamtang sa nasambit nga dalan.
Naulamid man ang poste sang kuryente kag nagtuga pa sang post fire.
Gilayon nga ginpasirado ang dalan agud nga wala na sang may mahalitan suno kay Cunlo.
Nagresponde ang troubleshooter sang Panay Electric Company (PECO) apang indi nila masarangan ang pagkuha sang naghilay nga poste.
Bangud sini, gilayon nga nagpadala sang ikaduha nga team sang troubleshooter ang PECO dala ang mga kinahanglanon nga equipment agud nga makuha ang poste sa dalan.
Naglab-ot sa inoras suno kay Cunlo bag-o nakuha ang nagahilay nga poste.
Wala sang may narecord nga mayor nga insidente sa syudad sang Iloilo may kaangtanan sa paglaslas ni bagyo Ompong sa pungsod.
Sa interview sang Bombo Radyo kay Darwin Papa, pinuno sang City Disaster Risk Reduction and Managament Office (CDRRMO), iya ginpahayag nga wala sang daku nga kahalitan nga natabo sa syudad.
Bisan pa nga kun kaisa, nagamadlos ang hangin, normal lamang ini suno kay Papa bangud nga nagapekto ang Habagat sa Visayas kag Mindanao.
Sa bahin naman sang mga na-stranded nga pasahero, may yara suno sa iya sang Memorandum of Agreement ang City Government kag ang Probinsya sang Guimaras.
Santo sa kasugtanan, katungdanan sang syudad nga buligan ang mga stranded nga pasahero kag amo man ang matabo sa mga stranded nga pasahero sa Guimaras.