𝗜𝗟𝗢𝗜𝗟𝗢 𝗖𝗜𝗧𝗬 — Nag-ako ang Iloilo City Engineers Office nga may mga on-going sila nga proyekto nga nangin rason sa pagbaha sa pila ka mga lugar sa Iloilo City.
Sa interview sang Bombo Radyo kay Joel Gerasmia, Chief of Staff sang City Engineers Office, may mga wala pa matapos nga mga proyekto nga ila ginatukod, rason man nga nagatuga sang pagpugong sa mga drainage sang syudad.
Suno kay Gerasmia, kinahanglan na nga i-upgrade ang mga drainage sa syudad agud nga mahagan-hagan na ang madasig nga pagsaka sang tubig sa mga manubo nga lugar sa Iloilo City.
Ginalantaw man sini nga ang solusyon sa amo nga problema amo ang pumping station agud nga mabuhinan ang mga drainage nga mahinay mag-ilig bangud may mga nagasupon nga basura.
Ginpahayag man sini nga tuman ka importante ang pumping station bangud makabulig ini pabalik sang tubig-baha nga nagasulod sa manubo nga lugar nga mabalik liwat sa baybayon.
Dako naman nga pagpanghangkat sa talatapan ang madasig nga pagtaas sang tubig-baha sa oras sang taob.
