Ginkumpirma sang Iloilo City Engineer’s Office nga wala sang nagakaigo nga excavation permit ang mga nagpakilala nga magapatigayon sang excavation sa bahin sang Guanco Street.
Sa interview sang Bombo Radyo kay Chester Jover, aerial kag excavation permit in-charge sang City Engineer’s Office, iya ginpahayag nga wala gid sila sang bisan ano nga ihibalo ukon pahibalo parte sa ginpatigayon nga excavation sa amo nga lugar, rason nga nagakatingala ang ila opisina kun ngaa may nag-ubra didto nga wala man lang nag-agi sa nagakaigo nga proseso.
Suno kay Jover, antes maghiwat sang bisan ano nga excavation sa siyudad, kinahanglan anay mag-secure sang excavation permit gikan sa City Engineer’s Office, lakip na ang koordinasyon sa nagkalain-lain nga ahensya. Apang base sa ila rekord, wala sang gin-apply ukon gin-aprubahan nga permit para sa Guanco Street sa amo nga tion.
Ginpaandam man ni Jover nga mahimo magpangatubang sang nagakaigo nga kaso ukon penalidad ang sin-o man nga mapamatud-an nga naghiwat sang ilegal nga excavation, bangud ini ang nagalapas sa mga ordinansa sang siyudad kag nagahatag sang peligro indi lamang sa imprastraktura kundi pati na sa publiko.
Sa matandaan nga, una nga ginpahayag sang kapulisan nga wala man sang permit ang mga nagpakilala nga tinawo sang telecommunications company nga ginapatihan nagpatigayon sang repair sa manhole malapit sa bangko kag pawnshop sa Guanco Street.
Ginpahayag man sang kapulisan nga gintuad sang nasambit nga telecommunications company nga wala sila sang ginpatigayon nga maintenance operation sa lugar, kag padayon pa karon ang imbestigasyon sang awtoridad.
