ILOILO CITY – Ginpaathag sang tul-id sang Iloilo City Engineer’s Office kun nga-a nakalab-ot gid sa P800,000 ang drone nga ginbakal sang Iloilo city Government.
Sa interview sang Bombo Radyo kay Engr. Heidi Villanueva, Engineer 2 sang Iloilo City Engineer’s Office, iya ginpahayag nga indi lamang ang aircraft ukon ang drone ang ginbakal kundi lakip na diri ang accessories kasubong sang system, computer, printer, camera, monitor, laptop kag ang bayad sa tatlo ka session sang training kun paano gamiton ang drone.
Sa pagpaathag ni Engr. Villanueva, ang ginbakal nga drone ang may yara sang brand nga Phantom 4 RTK nga makabig nga branded kag may yara sang maayo nga specifications kasubong sang Real-time kinematic kag may accurate low altitude mapping solution.
Ang request suno kay Engr.Villanueva ang nahuman na sadtong termino pa ni dismissed Iloilo City Mayor Jed Patrick Mabilog apang subong lang natuman bangud sa kakulang sang bidder sadto.
Ginpahayag sang natungdan nga mapuslan gid ang drone sa pagpatigayon sang mapping kag makabulig sa pagdisenyo sang dariange kag road network.
Magluwas sa drone, ginpresentar man ni Engr.Villanueva ang iban pa gid nga ginbakal sang Iloilo City Government nga computer set, laptop, projector, printer kag iban pa nga gamit sang Iloilo City Government.
