ILOILO CITY — Nag-umpisa na ang Iloilo City General Services Office (GSO) sang clearing sa center island sang Diversion Road, Iloilo City agud islan ang mga nagkalalaya nga tanum.
Sa interview sang Bombo Radyo kay Eng. Niel Ravena, pinuno sang amo nga talatapan, iya ginpahayag nga bangud sa tuman ka init nga tyempo, naglab-ot sa 130 ka mga royal palm trees ang napatay.
Suno kay Ravena, ang mga nakalalaya nga kahoy ang amat-amat na nga ginapangkuha subong agud islan sang Dita tree.
Ginpahayag man sini nga nagbakal ang talatapan sang 128 ka mga Dita tree agud gilayon nga matanum kag mabuslan ang nabakante nga center island.
Plano naman sang GSO nga padalumon ang buho sang pagatamnan sang kahoy paagi sa jet grouting agud nga magpanggamot ini sa duta kag indi dali-dali magabot kun may bagyo.
