Ginclassify na ang syudad sang Iloilo nga may moderate risk sa COVID-19.
Ini ang santo sa latest nga risk classification sang Department of Health (DOH).
Sa interview sang Bombo Radyo kay Dr. Roland Jay Fortuna, COVID-19 team focal person sang Iloilo City Government, iya ginpahayag nga Hulyo 7 tubtob Hulyo 12 lamang ginclassify ang syudad bilang high risk sa COVID-19.
Suno kay Fortuna, nangin basehan sang DOH ang nangin mataas nga health care utiliation rate sang Iloilo City.
Apang as of July 13, ginclassify na ang syudad nga moderate risk sa COVID-19.
Pahayag niya, nalakip sa moderate risk sa COVID-19 ang Bacolod City.
Samtang yara naman sa low risk sa COVID-19 ang probinsya sang Iloilo, Aklan kag Antique.
Sa pihak nga bahin, gintawag naman ni Iloilo City Mayor Jerry Treñas nga ‘manughiwit’ ang COVID-19 Inter-Agency Task Force for the Management of Emerging Infectious Diseases (IATF-EID).
Sa interview sang Bombo Radyo kay Mayor Treñas, iya ginpahayag nga indi niya mahangpan kun ano gid bala ang matuod nga basehan sa pagclassify sang risk classifcation sang syudad.
Suno kay Mayor Treñas, magarequest siya sa IATF nga maghimo sang desisyon nga santo sa science kag indi lamang base sa paghaom-haom kag kun ano ang ila nga nabatyagan.
Pahayag pa sang alklade, bangud moderate na ang risgo sang syudad sa COVID-19, ilakip ini sa apelar sang Iloilo City nga indi na pagpahugtan ang quarantine classification status.
Ginhingyo man sang alkalde ang business sectors nga magpadala sa IATF sang separado nga appeal.
