ILOILO CITY – Bugal para kay Iloilo City Mayor Jerry Treñas ang pagkilala sang Philippine Chamber of Commerce and Industry sa syudad sang Iloilo bilang business friendly city outside Metro Manila.
Sa interview sang Bombo Radyo kay Treñas, iya ginpahayag nga isa ka maayo nga palatandaan sang iya maayo nga pagdumala ang nasambit nga pagkilala.
Suno kay Treñas, ini ang rason kun nga-a tuman ang iya nga pagpakigbato agud nga matapna ang kurapsyon sa Iloilo City Hall sa diin ginhalimbawa niya ang 180 ka peke nga kasal nga narehistro sa Local Civil Registry kag ang ginapahayag pamulutika sa mga empleyado.
Ginpahayag ni Treñas nga iya nga ginatutukan amo ang reclassification sang mga duta sa circumferential kag coastal road agud nga makapatindog sang warehouse ang mga negosyante nga naga-apply sang permit.
Magluwas diri, gin isa-isa man ni Treñas ang mga dalagku nga proyekto nga igapatuman sa syudad sang Iloilo sa diin pila lamang diri amo ang pagpatukod sang disaster resilience kag command center, pagpatukod sang warehouse para sa supplies sang Iloilo City Government, paghatag sang dugang nga motorsiklo para sa Philippine National Police, pagpahamtang sang libre nga wifi sa Esplanade project, public plaza kag sa Iloilo City Hall kag pagpatukod sang Regional Evacuation Center kag Depot for Non-Food items.
