Ginabi-abi sang Iloilo City Government ang desisyon sang Korte Suprema nga pagbasura sang petisyon nga ginpasaka sang Riverside Group of Companies nga ginapanag-iyahan sang Pamilya Pison nga nagakwestyon sa pagsaka sang appraisal sang real properties sa syudad para sa tax purposes.
Sa interview sang Bombo Radyo kay Joy Fantilaga-Gorzal, spokesperson ni Mayor Raisa Treñas, iya ginpahayag nga ang desisyon sang Korte Suprema nagapamatuod nga legal, husto kag may maayo nga intensyon ang Iloilo City Government sa pagpatuman sang ila tax measures.
Sa desisyon sang Korte Suprema, ginpahayag nga ang Iloilo City Government nag-akto lamang sa pagpatuman kag pagpasar sang Real Property Tax Ordinance.
Nahibaluan nga gindismiss sang korte ang petisyon bangud wala nasunod sang mga petitioner ang insakto nga hierarchy of courts kag wala man nila napamatud-an sang nagakaigo ang ila mga alegasyon.
Suno sa Iloilo City Government, ang adjustment ginpatuman suno sa nagakaigo nga public consultations kag due process.
18 na ka tuig ang nagligad antes na-update ang appraisal sang mga propedad sa Iloilo City.
Dugang pa ni Gorzal, agud mapahagan-hagan ang epekto sang RPT adjustment sa mga landowners, gin-aprubahan na sang konseho sang nagligad nga tuig ang ordinansa nga naga-extend tubtob 2028 sang 40% discount sa real property tax payments, lakip ang dugang nga 10% incentive para sa early payment.
