Ginaduso sang Iloilo City Government nga magapatigayon sang Market Day sa kada merkado sa syudad sang Iloilo.
Sa interview sang Bombo Radyo kay Joy Fantilaga Gorzal, Spokesperson ni Mayor Raisa Treñas, iya ginpahayag nga ini agud mahatagan sang oportunidad ang mga vendors kag mga bolantero halin sa Probinsya sang Iloilo nga makabagsak kag makabaligya sang ila mga produkto sa mga nagkalain-lain nga merkado sa Syudad.
Ginaproponer sang alkalde kag Local Economic Enterprise Office (LEEO) nga himuon ang adlaw sang Martes nga Market day para sa terminal Market.
Ang adlaw sang Miyerkules naman para sa La Paz Market.
Samtang, ang adlaw sang Huwebes ang Market Day sa Jaro Big Market kun sa diin naandan na nga schedule para sa pagpaninda sang mga pumuluyo.
Pagahatagan naman sang kahigayunan ang mga bulantero nagikan sa Probinsya sang Iloilo nga makabagsak kag makabaligya indi lang sa Iloilo Terminal Public Market kundi sa tanan nga merkado sa syudad.
Nagapadayon naman ang koordinasyon sa mga vendors kag nagkalain-lain nga mga market associations agud ma-finalize na ang nasambit nga inisyatibo.
