ILOILO CITY – Ginahitso na sang Iloilo City Government ang pagpadala sang specimen sa Cebu agud nga masolusyunan ang atrasado nga pagpaguwa sang resulta sang COVID-19 sang Western Visayas Medical Center Sub-National Laboratory.
Sa interview sang Bombo Radyo kay Mayor Jerry Treñas, iya ginpahayag nga gina-isip na kun pila ang backlogs agud nga ini ang mapadala gilayon sa Cebu.
Sa subong suno kay Treñas, ginabanta nga 10 ka adlaw pa ang hulaton antes magguwa ang resulta sang COVID-19 test.
May kaangtanan diri, nagpadala na sang mensahe ang alkalde kay Department of National Defense Sec. Delfin Lorenzana tuhoy sa pag-transport sang specimen.
Sa pagpaathag naman ni Dr. Stephanie Abello, chief pathologist sang Western Visayas Medical Center Sub-National Laboratory, mahimo nga atrasado lang ang pagtapos sa paper works.
Ini bangud nga magluwas nga may mga staff nga nagpositibo sa COVID-19, isa man sa problema amo ang tuhoy sa pag-print sang COVID-19 results apang wala lang na detalye ni Abello kun ano gid ang specific nga problema tuhoy sa printing process.
Sa subong, ginpahayag sang natungdan nga naubos na sa pagproseso ang specimen nga nabaton sang bulan sang Agosto kag ang ginalagas sa subong amo ang sa bulan sang Setyembre.
