Napasa na sang Iloilo City Government sa Department of the Interior and Local Government (DILG) Iloilo City ang listahan sang 4,100 ka mga qualified nga mga tricycle drivers nga makabaton sang fuel subsidy nga natalana nga ipanagtag sang Land Transportation Franchising and Regulatory Board (LTFRB).
Sa interview sang Bombo Radyo kay Mr. Jeck Conlu, pinuno sang Public Safety and Transportation Management Office (PSTMO), iya ginpahayag nga gin-follow up na ni Iloilo City Mayor Jerry Treñas ang guidelines, ang pondo kag ang proseso sa paghatag sang ayuda sa mga tricycle drivers sa syudad.
Posible suno sa natungdan nga i-download sa Iloilo City Government ang ayuda amo nga kinahanglan gilayon nga mag-ubra sang pagsulundan ang syudad nga indi mapadugay ang pagpanagtag sini sa mga nagakinahanglan nga drivers.
Ang instruction sang alkalde suno kay Conlu nga dapat mahatag direkta sang mga drivers ang ila nga fuel subsidy.
Indi naman makabaton sang ayuda ang mga kolorum nga tricycle drivers ukon ang mga wala prangkisa nga nagabyahe sa syudad.
Samtang, ginaproblema naman sang pila ka mga tricycle association ang mga kolorum nga nagabyahe sa syudad.
Sa interview sang Bombo Radyo kay Mr. Henry Bercades, Presidente sang Tricycle Owners and Driver’s Association- Iloilo City Proper, iya ginpahayag nga padayon ang ila pagpasulod sang mga new franchise sa ila nga asosayon agud nga mangin legal ang ila pagbyahe sa syudad.
Suno kay Bercades, ang pagkuha sang prangkisa ang indi lang para sa fuel subsidy kundi agud indi na mag- untat ang ila pagbyahe nga amo man ang masami ila nga pangabuhian.
Gina-engganyo sang natungdan ang mga drivers sa syudad nga magkuha sang prangkisa bangud wala man sang pili ang ila asosasyon sa kun sin-o ang pahanugutan nga magbyahe.
