ILOILO CITY – Ginlaslasan ni Iloilo City Councilor Atty. Sedfrey Cabaluna nga National Telecommunications Commission kag mga telecommunications companies sa syudad bangud sa kontrobersyal nga modified signal jamming kadungan sang selebrasyon sang Dinagyang Festival 2023.
Sa ginpatigayon nga consultative meeting sang Committee on Energy and Public Utilities sa Iloilo City council, ginpahayag ni Cabaluna nga ginhimo nga butigon sang National Telecommunications Commission kag mga telecommunications companies ang Iloilo City Government bangud sa sala nga impormasyon sa ginpatigayon nga signal shutdown.
Suno pa kay Cabaluna, nagagwa man nga wala napahibalo ang Sangguniang Panlungsod.
Pahayag sang natungdan, ang mga nasambit nga ahensya ang mas nakahibalo sang proseso apang wala ginpahibalo sa ila.
Kun nagpahibalo na kuntani ang mga ini sa una pa lang, napahibalo man sang syudad ang publiko nga maapektuhan man ang mga lugar nga malayo sa venue sang mga aktibidad sang Dinagyang Festival.
Gindugang pa ni Cabaluna nga indi pa kuntani sila magpasugot sa signal shutdown apang ginpasalig sang Philippine National Police nga pili lamang nga mga lugar ang apektado.
Liwat naman nga nagdepensa ang National Telecommunications Commission- Region VI may kaangtanan sa ginpatuman nga modified signal jamming sa Iloilo City kadungan sang ginpatigayon nga Iloilo Dinagyang Festival 2023.
Sa interview sang Bombo Radyo kay Engr. Lea dela Cruz-Doromal, Officer-in-charge sang ahensya, iya ginpahayag nga nagsunod lamang sila sa request sang Philippine National Police bilang kabahin sang pagpasiguro sang seguridad sa syudad.
Paathag ni Doromal, ang katungdanan nila amo nga mag-monitor kun nagasunod sa ila mando ang mga telecommunications company.
Una naman nga ginpahayag ni Atty. Deo Virgil Tan, ang legal officer sang ahensya nga nakadepende sa radius ukon sakop sang tagsa ka cellular site ang maapektuhan nga lugar.
Ginpahayag dugang sang natungdan nga may mga cellular sites nga malapad ang area of coverage gani malapad man ang sakop sang signal jamming.
