Ginapabaskog pa sang Iloilo City Government ang mga patakaran sa pagtransport kag pag-ihaw sang mga livestock nga nagasulod sa syudad.
Ini ang kasunod sa ginpagwa nga Memorandum Order No. 234 ni Mayor Raisa Treñas sang Hulyo 1.
Sa interview sa Bombo Radyo kay Dr. Fernando Abulencia, Iloilo City Veterinarian, iya ginpahayag nga ang tanan nga sapat nga pagaihawon kaangay sang baboy, baka kag karabaw nga magasulod sa siyudad kinahanglan maihaw sa sulod sang 24 ka oras kun makaabot sa Iloilo City Slaughterhouse sa Tacas, Jaro.
Suno pa kay Abulencia nga kinahanglan ipakita sang mga nagadala sang livestock ang orihinal nga kopya sang tanan nga kinahanglanon nga dokumento sa mga Meat Inspection Officers.
Base sa memorandum, ang bisan sin-o nga mapaslawan sa pagtuman sang amo nga patakaran magapangatubang sang administrative liabilities, quarantine ukon iban pa nga regulatory sanctions.
Ini nga memorandum ni Mayor Treñas ginpagwa kasunod sang mga positibo nga kaso sang African Swine Fever sa mga probinsya sang Capiz kag Iloilo, kag sa Negros Occidental.
Ini agud maprotektahan ang industriya sang kasapatan kag masiguro ang kaluwasan sang karne nga ginabaligya sa Siyudad sang Iloilo.
