Ginpasiguro sang Iloilo City Government nga mahatagan sang pagkaon kag pagtatap ang masobra 100 nga mga pasahero nga na-stranded sa Iloilo bangud sa kanselasyon sang byahe pakadto sa Guimaras dala sang malain nga tyempo.
Lakip sa na-stranded amo ang 70 ka mga indibidwal nga ginpatinir anay sa isa ka eskwelahan bangud nga ginkanselar sang Philippine Coast Guard (PCG)- Iloilo ang byahe sang Roll-On Roll-Off vessels bangud sang dalagko nga balod.
Magluwas diri, may 80 man nga stranded sa Parola Wharf kasunod sang kanselasyon sang byahe sang sakayang pandagat padulong sa Guimaras kag vice versa.
Suno kay Barangay Kagawad Tum-Tum Paulino sang Barangay Concepcion, City Proper, nag-responde gid gilayon ang City Social Welfare and Development Office, may ginbutang nga community kitchen para indi magutman ang mga tawo, kag ginhatagan man sila sang hiligdaan.
May ginpadala man nga emergency response team bangud lakip sa naalangan sa pagpauli amo ang senior citizens kag ang duha ka mga pasyente nga nagapaidalom pa sa dialysis treatment.
