Natigayon na nga ma-turn-over sang Iloilo City Government kag Department of Social Welfare and Development ang kabug-usan nga P3.650 million nga balor sang cheque para sa walo ka community-based associations sa syudad sang Iloilo para sa Sustainable Livelihood Program.
Sa interview sang Bombo Radyo kay Joy Fantila-Gorzal, Spokesperson ni Mayor Raisa Treñas, iya ginpahayag nga ini nga programa may katuyuan nga makahatag sang dugang nga bulig kag kapital para sa ila mga negosyo.
Pahayag pa sini nga may mga ginpatigayon naman nga trainings para sa mga walo ka mga asosasyon antes ang releasing kag isa sa mga ini amo ang financial training.
Ini agud siguraduhon nga nakahibalo ang mga ini sa pag-manage sang nasambit nga kapital.
Nakadepende naman sa klase sang negosyo ang balor sang dugang nga kapital nga ila mabaton.
Suno pa kay Gorzal, positibo man ang feedback nga nabaton sang Iloilo City Government nahanugod sa sini nga programa.
Dako naman ang pagpasalamat sang mga benepisyaryo ilabi na sang mga senior citizen sa Local Government bangud naka-avail ang mga ini sang nasambit nga programa.
Nahibaluan nga kabug-usan nga 11 tanan ka mga asosasyon ang nakabenepisyo sa amo nga programa lakip na diri ang tatlo ka assosasyon sang nagligad nga tuig.
Nagpain man ang Iloilo City Government sang dugang nga P9.9 million bilang counterpart fund para sa Community Livelihood Packages.elihood packages.
By: Bombo Ireca Pioquinto
