𝗜𝗟𝗢𝗜𝗟𝗢 𝗖𝗜𝗧𝗬 — Nakatalana nga butangan sang Iloilo City Government sang mga closed-circuit television ukon CCTV ang tanan nga parte sang Iloilo Esplanade agud nga mapabilin nga hilway ini sa mga katalagman.
Ini kasunod man sang kaso sang pagpanghampak sang sanga sang kahoy sang anom ka mga kalalakihan sa isa ka pamatan-on sa amo nga lugar.
Sa interview sang Bombo Radyo kay Iloilo City Mayor Jerry Treñas, iya ginpahayag nga naimbestigaran na ang nasambit nga kaso kag nadakpan ang pila sa mga suspek.
Suno kay Treñas, apisar sang natabo nga insidente, nagapabilin sa gihapon nga safe ang syudad, sa diin, nagaguwa sa pagtuon sang Numbeo Southeast Asia: Safety Index for 2023 nga yara sa ika-walo nga pwesto ang Iloilo City sa mga safest city Asya.
Ginhatagan naman sang importansya ni Treñas ang apat ka mga bag-o nga Police Stations sa syudad bangud mangin dako ini nga bulig agud nga hugot nga mabantayan ang Iloilo esplanade.
Nagmandu man ini sa unit heads sang kapulisan agud nga mag-deploy sang ila nga katapo sa lugar agud nga mamintenar ang kalinong kag katawhay.
