Magadugang sang portalets ang Iloilo City Government para sa publiko sa tion sang Dinagyang Festival 2027.
Pangabayon man ang mga business establishments sa siyudad nga buksan ang ila mga comfort room para sa mga turista kag dumuluong.
Sa interview sang Bombo Radyo kay General Services Office (GSO) Head Engineer Neil Ravena, iya ginpahayag nga may walo na ka bag-o nga portalets ang city government nga igadugang sa mga comfort room sa nagkalain-lain nga public places.
Ini kasunod sang plano sang Iloilo Festivals Foundation, Inc. (IFFI) nga magpahamtang sang 60 tubtob 80 ka portalets sa Downtown area sa Enero 22 tubtob 24, 2027.
Apang, suno kay Ravena, bisan maglab-ot pa sa 100 ang kabug-usan nga portalets nga magamit sa tion sang kapistahan, posible gihapon nga indi ini ‘enough’ sa kadamuon sang mga bisita.
Samtang, ginapangabay ni City Councilor Rex Marcus Sarabia ang mga pribado nga establisemento nga magbukas sang ila mga CR bilang dugang nga pasilidad para sa mga turista.
Suno kay Sarabia, indi masarangan sang city government nga solo nga atubangon ang tanan nga kinahanglanon sang nagadagsa nga mga dumuluong, gani kinahanglan ang kooperasyon sang business sector.
Wala man, suno kay Sarabia, sang kinahanglanon nga bag-o nga ordinansa para sini bangud ang iya panawagan nakasentro sa boluntaryo nga pagbinuligay kag pagpakita sang pagkamabinuligon sang mga Ilonggo.
Magabulig man ang GSO personnel sa pagmintinar sang kalimpyo sang mga portalets, samtang ginapangabay ni Ravena ang publiko nga mangin responsable sa paggamit sini.
